Голубев/Недовесов Болгариядағы жарыстың ширек финалына шықты

Қазақстандықтар Андрей Голубев пен Александр Недовесов жұптық сында София (Болгария) ATP 250 жарысының ширек финалына шықты.
 

Қазақстандық жұп бастапқы кездесуін нидерландылық Робин Хасе – аустриялық Филипп Освальдпен өткізді. Голубев пен Недовесов қарсыластарын 6:3, 7:6 (7:5) есебімен тізе бүктірді. Олар сағат жарымға жуық уақытқа созылған бәсеке барысында 6 эйс жасап, 6 брейк-пойнттың біреуін пайдаланды.

Қазақстандық жұп жартылай финал жолдамасын жарыстың 4-ракеткалары, монаколық Хьюго Нис – поляк Ян Зелински немесе америкалық Хунтер Рис – Польшаның тағы бір өкілі Шимон Валков жұптарының қай жеңгенімен сарапқа салады.