Юлия Путинцева мен Андрей Голубев Ролан Гаррос турнирінде бастапқы кездесулерін сәтті өткізді

Қазақстандық теннисшілер Андрей Голубев пен Юлия Путинцева Ролан Гаррос турнирінде бастапқы кездесулерін сәтті өткізді, деп хабарлайды ҚТФ баспасөз қызметі.

Франция ашық чемпионатында Қазақстанның жұптық сындағы бірінші, әлемнің 21-ракеткасы Андрей Голубев корт иесі Фабрис Мартенмен бірге алғашқы айналымда аргентиналық Себастьян Баэс – бразилиялық Фелипе Мелигени Алвеспен ойнады. Бір сағат 21 минутқа созылған матчта қазақстандық-франциялық жұп 7:5, 6:3 есебімен жеңіске жетті. Олар 2 эйспен бірге 5 брейк-пойнттың екеуін пайдалана алды. Голубев пен Мартен екінші айналымда үндістандық Рохан Бопанна – нидерландылық Матве Мидделкоппен шеберлік байқасады. Т

Тағы бір қазақстандық, әлемнің 37-ракеткасы Юлия Путинцева жекелей сында бірінші айналымда дүниежүзілік рейтингте 112-орында тұрған, негізгі жарысқа іріктеу сайыстарынан кейін қосылған румыниялық Ирина Барамен кездесті. Бір сағаттан астам уақытқа созылған бәсекеде қазақстандық теннисші қарсыласын 6:3, 6:1 есебімен тізе бүктірді. Ю.Путинцева эйс жасамағанымен, 7 брейк-пойнттың бесеуін құр жіберген жоқ. Ю.Путинцева екінші айналымда әлемнің 30-ракеткасы, италиялық Камила Джорджи немесе рейтингіде 41-сатыдағы қытайлық Чжан Шуайдың біреуімен кортқа шығады.