Александр Недовесов жұптық сында Киев турнирінің финалына ал Тимофей Скатов жекелей сында жартылай финалына шықты

11.09.2021    Оқылғаны: 1083
Дереккөз: ҚТФ баспасөз қызметі
Автор:
Қазақстандық Александр Недовесов жұптық сында Киев челленджер турнирінің финалына шықты, деп хабарлайды ҚТФ баспасөз қызметі.

Осы жарыстың 1-ракеткалары болып тіркелген А.Недовесов пен бразилиялық Орландо Луж жартылай финалда чилилік Фернандо Гонсалес – америкалық Стив Джонсонмен кездесті. Қазақстандық-бразилиялық жұп 1 сағаттан астам уақытқа созылған бәсекеде 6:4, 6:4 есебімен жеңіске жетті. Недовесов пен Луж 7 брейк-пойнттың үшеуін пайдаланды. Қарсыластары бір ғана брейкпен шектелді. Сенбі күні қазақстандық-бразилиялық жұп турнирдің 2-ракеткалары, украиналық Денис Молчанов – Сергей Стаховскиймен бас жүлдені сарапқа салады.

Дүниежүзілік рейтингте 299-орында тұрған Т.Скатов ширек финалда әлемнің 283-ракеткасы, португалиялық Нуно Боргеспен күш сынасты. Бірінші партияда тай-брейкте португалиялық теннисші әбжілдік танытты – 7:6 (7:5). Дегенмен бұдан кейін қазақстандық спортшы ойын тізгінін қолына ала білді – 6:4, 6:4. Үш сағаттан астам уақытқа созылған тартысты бәсеке барысында Т.Скатов 14 брейк-пойнттың бесеуін пайдаланды. Қарсыласы 6 эйс, 3 брейкке (16 брейк-пойнт) қол жеткізді. Т.Скатов финалға шығу үшін рейтингте 291-сатыдағы италиялық Франко Агаменонемен таласады.

Тағы бір қазақстандық Дмитрий Попко жекелей сында жартылай финалға шыға алмады. Ол түркиялық Ерги Киркинмен өткен ширек финалдық матчта есеп 4:6, 0:1 болғаннан кейін жарысты жалғастырудан бас тартты.



Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.



Федерация серіктестері

Ақпараттық серіктестер