Александр Бублик Штутгарттағы турнирді жартылай финалда аяқтады
Қазақстанның ерлер арасындағы жекелей сындағы бірінші ракеткасы Александр Бублик Германияның Штутгарт қаласында өткен ATP 250 санатындағы турнирдің жартылай финалында жеңіліс тапты.
Әлемдік рейтингте 11-орында тұрған және жарыстың үшінші нөмірлі ойыншысы атанған қазақстандық теннисші финал жолдамасы үшін әлемнің тоғызыншы ракеткасы, америкалық Тейлор Фритцпен кездесті.
Кездесу екі сетке созылып, Бубликтің 4:6, 4:6 есебімен жеңілуімен аяқталды.
Теннисшілер кортта 1 сағат 9 минут өткізді. Осы уақыт ішінде Александр тоғыз эйс жасап, бес қос қателікке жол берді және үш брейк-пойнттың біреуін ғана сәтті пайдаланды.
Осылайша, Александр Бублик Штутгарттағы турнирдегі өнерін жартылай финал кезеңінде аяқтады.
Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.
