Астанада Қазақстанмен Корея құрамасынан кімдердің ойнайтыны белгілі болды
16-17 қарашада елордада өтетін Билли Джин Кинг кубогының плей-офф матчында Қазақстанмен ойнайтын Корея Республикасының құрамасы анықталды.
Кореялықтар капитаны Джунг Ба Ким команда құрамын жария етті.
Қазақстандықтарға қарсы Да Ён Бак (331 WTA), Со Хен Пак (жұптық сында 257-орын), Ку Ён Ву (417 WTA) және Ким Дабин (331WTA) ойнайды.
Бұдан бұрын Юрий Щукин бастаған бапкерлік құрам Қазақстаннан Елена Рыбакина, Зарина Дияс, Юлия Путинцева, Анна Данилина және Жібек Құламбаеваға сенім артқан болатын.
ITF әлемдік командалық рейтингісінде Қазақстан 13-орында тұрса, Корея 32-сатыда.
Ойындар Beeline Arena жабық хард корттарында болады. Іріктеу матчтары үш сеттік форматта төрт жекелей және бір жұптық кездесуден тұрады.
Матч жеңімпазы алдағы жылы сәуірде өтетін командалық әлем чемпионатының іріктеу кезеңіне жолдама алады.
Бәсекелерді Qazsport телеарнасы тікелей эфирде көрсетеді. Ойындар 16 қарашада Қазақстан уақытымен сағат 13.00-де, жексенбі күні сағат 12.00-де басталады.
Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.
