Рыбакина Мадридте Путинцеваны жеңіп, алғаш рет жартылай финалға шықты
Елена Рыбакина алғаш рет Мадрид (Испания) WTA 1000 турнирінің жартылай финалына жолдама алды.
Рыбакина ширек финалда отандасы, әлемнің 50-ракеткасы Юлия Путинцевамен жолықты.
Осыған дейін өзара екі кездесуде Путинцева басым түскен еді.
Бұл жолы бірінші партияда есеп 2:2 болған сәтте Юлия брейк жасап, сол қарқынынан танған жоқ – 6:4.
Екінші сетте есеп 1:1 болғанда, Путинцева тағы да брейкке қол жеткізді. Бірақ Рыбакина сол бойда таразы басын теңестірді – 2:2. Сосын тай-брейкте есесін жібермеді – 7:6 (7:4).
Үшінші, шешуші партияда Юлия 5:2 есебімен алға кетті. Содан кейін Елена доп бергенде, екі матчболын пайдалана алмады. Есесіне Рыбакина қатарынан бес геймді өз есебіне жазды – 7:5.
Елена Рыбакина финалға шығу үшін әлемнің 2-ракеткасы, осы жарыстың өткен жылғы чемпионы, Беларусь өкілі Арина Соболенкомен кездеседі.
Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.
