Елена Рыбакина Майами турнирінің финалында жеңіліп қалды
Елена Рыбакина Майами (АҚШ) WTA 1000 турнирінің финалында корт иесіне жол берді.
Қазақстандық теннисші финалда әлемнің 53-ракеткасы, америкалық Даниэль Коллинзбен чемпиондық атаққа таласты.
Бірінші партияда есеп 6:5 болған мезетте америкалық теннисші брейк жасап кетті – 7:5.
Коллинз екінші сетте де 2:0 есебімен алға шықты.
Елена таразы басын теңестіргенімен, Даниэль қайта брейк жасады – 5:3. Содан кейін төртінші матчболын мүлт жіберген жоқ – 6:3.
Екі сағат 2 минутқа созылған бәсеке барысында Рыбакина 5 эйс жасағанымен, 10 брейк-пойнттың біреуін ғана пайдаланды.
Есесіне қарсыласы 4 эйспен бірге 7 брейк-пойнттың үшеуін өз есебіне жазды.
Осылайша, Елена Рыбакина екінші жыл қатарынан Майами турнирінің финалында ұтылып қалды. Өткен жылы ол чехиялық Петра Квитоваға есе жіберген еді.
Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.
