Юлия Путинцева Мадрид мастерс турнирін сәтті бастады

Қазақстанның екінші, әлемнің 51-ракеткасы Юлия Путинцева Мадрид WTA 1000 турнирін сәтті бастады

Қазақстандық теннисші бастапқы кездесуін дүниежүзілік рейтингте өзінен төрт саты төмен тұрған америкалық Клэр Льюмен өткізді.

Бірінші партияда америкалық теннисші 2:0 есебімен алға кеткенімен, Путинцева таразы басын теңестірді – 2:2. Содан кейін өзі алға шыққанымен, Лью қарап қалмады. Есеп 4:4 болған мезетте Юлия брейк жасап, сосын сетболын пайдалана алды – 6:4.

Екінші сетте қазақстандық спортшы брейкпен алға кетті – 4:2. Ақыры матчқа доп бергенде, өз мүмкіндігін жіберген жоқ – 6:4.

Юлия жүлде қоры 7,7 млн еуродан асатын Мадрид мастерс жарысының үшінші айналымына шығу үшін әлемнің 5-ракеткасы, франциялық Каролин Гарсиямен кездеседі.