Фабиан Марожан Алматыдағы ATP 250 турнирінде өнер көрсетеді
Мажарстанның үздік теннисшілерінің бірі Фабиан Марожан 17-25 қазан аралығында Алматыда өтетін ATP 250 санатындағы халықаралық Almaty Open турниріне қатысатынын растады.
26 жастағы теннисші қазіргі таңда ATP әлемдік рейтингінде 54-орында тұр. Марожанның мансабындағы ең жоғары көрсеткіші – 36-орын. Ол бұл межеге 2024 жылдың мамыр айында жеткен.
Биылғы маусымда мажарстандық теннисші ATP Tour жарыстарында тұрақты өнер көрсетіп келеді. Жыл басында ол Оклендтегі ATP 250 турнирінің жартылай финалына дейін жетсе, маусым айында Мальоркадағы шөп төсенішіндегі жарыста да осы нәтижесін қайталады. Испаниядағы турнир барысында Марожан үш кездесуінде жеңіске жетіп, жартылай финалда жарыстың болашақ чемпионы Алехандро Давидович-Фокинаға үш сетте есе жіберді.
Almaty Open ATP 250 дәстүрлі түрде мықты теннисшілердің басын қосатын және ATP Tour ресми күнтізбесіне кіретін халықаралық турнир. Бұл жарыс Қазақстандағы күзгі маусымның ең ірі халықаралық спорттық оқиғаларының бірі саналады және жыл сайын түрлі елдерден келген жанкүйерлердің назарын аударады.
Турнир билеттері Ticketon.kz және Afisha.yandex.kz платформаларында сатылымға шықты. Билет бағасы 3 500 теңгеден басталады.
Қазақстан теннисінің барлық оқиғаларынан хабардар болыңыз, сайттағы жаңалықтардан ақпарат алыңыз және Instagram, Facebook және YouTube арналарындағы әлеуметтік парақшаларымызға жазылыңыз.
